“O‘zgidromet” Toshkentdagi navbatdagi chaqmoq va yomg‘irlar haqida ma’lum qildi

“O‘zgidromet” xabariga ko‘ra, 6-iyun kuni Toshkent shahrida ob-havo o‘zgarishi kuzatiladi. Bu haqda shahar hokimligi matbuot xizmati xabar bermoqda.

Vaqti-vaqti bilan chaqmoq chaqadi va yomg‘ir yog‘adi. G‘arbdan esadigan shamol tezligi 5-10 m/sni tashkil etadi. Chaqmoq paytida shamol tezligi 15-20 m/sga ortadi.

Havo harorati kunduzi +28...+30 daraja, kechqurun esa +15...+17 daraja iliq bo‘lishi kuzatilmoqda.

“Kuchli shamol sizga va yaqinlaringizga, mol-mulkingizga zarar yetkazmasligi uchun bunday paytda daraxtlar ostida yurmang hamda avtomobilingizni ham daraxtlar tagida saqlamang.

Kuchli yog‘ingarchilik oqibatida shahrimizda suv toshish holatlarini kuzatsangiz, 1050, 1055 telefon raqamlariga qo‘ng‘iroq qiling”, deyiladi xabarda.