To‘raqo‘rg‘onda “Moskvich” Tico bilan to‘qnashdi. YTHda andijonlik ikki keksa halok bo‘ldi

16-iyul kuni soat 20:20 atrofida Namangan viloyatining To‘raqo‘rg‘on tumanida yashovchi 28 yoshli I.P. “M-412” rusumli avtomashinasini Qodirobod mahallasidan o‘tuvchi Farg‘ona halqa yo‘lida haydab ketayotib, qarama-qarshi tomondan harakatlanib kelayotgan Andijon viloyati, Baliqchi tumanida yashagan 68 yoshli N.A. boshqaruvidagi Tico bilan to‘qnashuv sodir etgan. Bu haqda IIV matbuot xizmati ma’lum qildi.

YTH oqibatida Tico haydovchisi jarohat olib voqea joyida, uning yo‘lovchisi, Marhamat tumanida yashagan 67 yoshli M.M. kasalxonada vafot etgan.

Shuningdek, ushbu mashinaning yana 2 nafar yo‘lovchisi jarohat olib, kasalxonaga yotqizilgan.

Holat yuzasidan jinoyat ishi qo‘zg‘atilib, tergov harakatlari olib borilmoqda.