O‘zbekistonda kadastr hujjatlarini tayyorlash bo‘yicha davlat xizmatlarining yangi narxlari belgilandi

Kadastr hujjatlarini tayyorlash bo‘yicha davlat xizmatlari narxlarini belgilashda tabaqalashtirilgan yondashuv tartibini takomillashtirish to‘g‘risidagi hukumat qaroriga o‘zgartirishlar kiritildi.

Kiritilgan o‘zgartirishlarga muvofiq, 2019-yil 1-oktabrdan ko‘chmas mulk obyektlariga bo‘lgan huquqlar va ular bo‘yicha tuzilgan bitimlarni davlat ro‘yxatidan o‘tkazish uchun quyidagi narxlar belgilandi:

jismoniy shaxslarning umumiy maydoni 100 kvadrat metrgacha bo‘lgan turar joy ko‘chmas mulk obyektlari va davlat reyestridan ko‘chirmalar — bazaviy hisoblash miqdorining 1,25 baravari;

101 kvadrat metrdan 300 kvadrat metrgacha bo‘lganida — bazaviy hisoblash miqdorining 2 baravari;

301 kvadrat metrdan ortiq bo‘lsa — bazaviy hisoblash miqdorining 3 baravari;

yuridik shaxslarning turar joy ko‘chmas mulk obyektlari va davlat reyestridan ko‘chirmalar — bazaviy hisoblash miqdorining 5 baravari;

jismoniy shaxslarning noturar joy ko‘chmas mulk obyektlari va davlat reyestridan ko‘chirmalar — bazaviy hisoblash miqdorining 3 baravari;

yuridik shaxslarning noturar joy ko‘chmas mulk obyektlari va davlat reyestridan ko‘chirmalar — bazaviy hisoblash miqdorining 5 baravari;

jismoniy shaxslarning yakka tartibda turar joy qurish uchun berilgan yerga bo‘lgan huquqlarini davlat ro‘yxatidan o‘tkazish va davlat reyestridan ko‘chirmalar — bazaviy hisoblash miqdorining 1 baravari;

jismoniy shaxslarning noturar joy obyektlari uchun berilgan yerga bo‘lgan huquqlarini davlat ro‘yxatidan o‘tkazish va davlat reyestridan ko‘chirmalar — bazaviy hisoblash miqdorining 3 baravari;

yuridik shaxslarga berilgan yer uchastkasiga bo‘lgan huquqlarni davlat ro‘yxatidan o‘tkazish va davlat reyestridan ko‘chirmalar — bazaviy hisoblash miqdorining 5 baravari;

ipoteka va ipoteka haqidagi shartnomani, shuningdek, ijara huquqini davlat ro‘yxatidan o‘tkazish — bazaviy hisoblash miqdorining 1,25 baravari;

mulkida turar joy borligi (yo‘qligi) haqida axborot berish — bazaviy hisoblash miqdorining 20 foizi.

Ko‘chmas mulk obyektlariga manzillar berish, ularni o‘zgartirish va mavjudligini bekor qilish uchun bazaviy hisoblash miqdorining 1 baravari miqdorida yig‘im undiriladi.

Shuningdek, yangi obyektga kadastr pasportini rasmiylashtirishda faqat kadastr pasportini shakllantirish va geokod berish uchun haq undiriladi.

I va II guruhlar nogironlari va Ikkinchi jahon urushi qatnashchilari uchun yuqoridagi davlat xizmatlari narxi umumiy qiymatining 50 foizini tashkil qiladi.