Qiziga o‘xshab kiyinib qochishga uringan jinoyatchi qamoqxonada vafot etdi

Giyohvand moddalar savdosi bo‘yicha qamalgan braziliyalik jinoyatchi Klauvinu da Silva ayol ko‘rinishida kiyinib olib qamoqxonadan qochishga uringanidan uch kun o‘tib o‘z kamerasida o‘lik holda topildi, deb xabar beradi “Korrespondent.net”.

Rio-de-Janeyro shtatida joylashgan qamoqxona ma’muriyatining ma’lum qilishicha, 43 yoshli da Silva o‘z joniga qasd qilgan.

Klauvinu da Silva 19 yoshli qizining ko‘rinishida qamoqdan qochishga uringan. Buning uchun u parik, silikon niqob, ko‘zoynak va pushti mayka kiyib olgan. Biroq da Silvaning rejasi amalga oshmay qolgan va u qo‘lga tushgan. Klauvinu da Silva giyohvand moddalar savdosi uchun 73 yil 10 oyga ozodlikdan mahrum etilgan edi.