Buxoroda tug‘ilgan uch egizakka Shavkat, Miromon va Mirziyo deb ism qo‘yildi

Buxorolik Jamshid Shodiyev va Nigora Botirovalar oilasida uch egizak o‘g‘il dunyoga keldi. “Novosti Uzbekistana” nashri xabariga ko‘ra, 28-mart kuni tug‘ilgan chaqaloqlarga ota-ona Shavkat, Miromon va Mirziyo deya ism qo‘ygan, ularning ahvoli barqaror.

Jamshid va Nigora 2014-yilda oila qurgan, bir yildan so‘ng ularning qizi — Rayhon tug‘ilgan edi.

Tug‘uruqxonaga og‘ir ahvolda olib kelingan edim. Shifokorlar ikki kun davomida qo‘llaridan kelgan barcha yordamni ko‘rsatishdi, biroq oxiri kesarcha kesish yo‘lidan foydalanishga qaror qilindi. Hozir hammasi yaxshi, qutlovlarni qabul qilyapman. Viloyat hokimi ham tabrikladi. Uch o‘rinli aravacha va gullar sovg‘a qildi.

Nigora Botirva, uch egizak — Shavkat, Miromon va Mirziyoning onasi

“Novosti Uzbekistana”ning yozishicha, bu Buxoroda tug‘ilgan uch egizaklarga mamlakat Prezidenti sharafiga ism qo‘yish bo‘yicha birinchi holat emas. 1990-yillarning o‘rtalarida viloyatda Islom, Abdug‘ani va Karim ham dunyoga kelgan edi.

Tug‘uruqxona shifokori Mehriniso Muhamedovaning so‘zlariga ko‘ra, Buxoroda uch egizaklarning tug‘ilishi yildan-yilga ko‘paymoqda. 2015-yili perinatal markazda uch egizak tug‘ilishi bilan bog‘liq to‘rt holat qayd etilgan bo‘lsa, 2016-yilda beshta, 2017-yilning dastlabki uch oyida esa uchta holat qayd etildi.

“Daryo”ning Telegram’dagi rasmiy kanali — @toshqindaryo’ga a’zo bo‘ling!