Abdulla Aripov So‘xdagi mojaro sabab Qirg‘iziston hukumati vakili bilan uchrashadi

O‘zbekiston bosh vaziri Abdulla Aripov 1-iyun kuni Qirg‘iziston bosh vaziri birinchi o‘rinbosari (bosh vazir vazifasini vaqtincha bajaruvchi) Kubatbek Bo‘ronov bilan uchrashadi. Bu haqda “Kaktus” xabar bermoqda.

Xabar berishlaricha, Qirg‘iziston bosh vaziri birinchi o‘rinbosari Botken viloyati Qadamjoy tumaniga kelgan. U O‘zbekiston hukumati rahbari bilan chegara zonasida ikki qishloq aholisi o‘rtasida 31-may kuni yuz bergan ziddiyatni muhokama qilishi kutilmoqda.

Qirg‘iziston hukumati ma’lumotlariga ko‘ra, 1-iyun holatiga ko‘ra chegara zonasidagi vaziyat tartibga keltirilgan. Rasmiylar xavfsizlik choralarini kuchaytirgan. Tegishli organlar mahalliy aholi orasida tushuntirish ishlarini olib bormoqda.

Voqea 31-may kuni yuz bergan edi. Dastlabki taxminlarga ko‘ra, mojaro Qirg‘izistonning Chechme qishlog‘idagi, O‘zbekiston tomoni ham foydalanadigan buloq sabab chiqqan. Hodisa joyidan olingan videolarda odamlar bir-biri tomon tosh otayotganini ko‘rish mumkin.

Mavzuga doir: O‘zbekiston—Qirg‘iziston chegarasida yuz bergan mojaro yuzasidan rasmiy axborot berildi