Bangladeshdagi suv toshqinlari oqibatida 27 kishi halok bo‘ldi

Bangladeshdagi kuchli yog‘ingarchilik oqibatida kelib chiqqan suv toshqinlari oqibatida kamida 27 kishi halok bo‘ldi. Bu haqda “RIA Novosti” xabar bermoqda.

O‘tgan hafta oxirida Hindiston va Nepal qatori Bangladeshga ham kuchli yomg‘irlar yopirildi. Musson yomg‘irlari daryolarning o‘zanidan chiqib, toshishiga sabab bo‘ldi.

Bangladeshda tabiiy ofat oqibatidagi o‘lim holatlari asosan shimoliy hududlarda qayd etilgan. Xususan, Dinajpur okrugida 13 kishi, Kurigramda 11 kishi, Lalmonirxatda esa uch kishi halok bo‘lgan.

Mamlakat favqulodda vaziyatlar vazirligi ma’lumotlariga ko‘ra, tabiiy ofat Bangladeshning 64 okrugidan 20 tasini qamrab olgan, 370 ming kishi vaqtinchalik boshpanalarga joylashtirilgan.

“Daryo”ning Telegram’dagi rasmiy kanali — @toshqindaryo’ga a’zo bo‘ling!