Mixail Saakashvili Kiyevda qo‘lga olindi va hibsxonaga yetkazildi

Kiyevda Odessa viloyatining sobiq gubernatori Mixail Saakashvili qo‘lga olindi. Bu haqda Ukraina bosh prokurori Yuriy Lutsenko ma’lum qildi, deya xabar beradi “RIA Novosti”.

“Milliy politsiya xodimlari qidiruv haqidagi qarorga muvofiq Saakashvili Kiyev shahrining Otradnoy ko‘chasida ekanligini aniqladi va qo‘lga oldi. U vaqtinchalik tutib turish hibsxonasiga joylashtirildi”, — deya yozuv qoldirdi Lutsenko Facebook’dagi sahifasida.

Gruziyaning sobiq yetakchisi tergovchiga yetkazildi, qo‘lga olish chog‘ida hech kim jabrlanmadi.

Saakashvilining advokati Pavel Bogomazovga ko‘ra, sud 72 soat mobaynida siyosatchiga qanday ehtiyot chorasi qo‘llash haqida qaror qabul qiladi.