Shohjahon Ergashev 18 ta jangining barchasida zafar quchgan amerikalik Soni Fredriksonga qarshi ringga chiqadi

12-yanvar kuni o‘zbekistonlik bokschi Shohjahon Ergashev professional ringdagi 12-jangini o‘tkazadi, deb yozdi Boxing Sceane nashri.

Shu kuni Ergashevga amerikalik Soni Fredrikson raqib bo‘ladi. O‘z vazn toifasida reytingda sakkizinchi bo‘lib turgan Fredrikson, faoliyati davomida 18 ta jang o‘tkazgan bo‘lib, ularning barchasida raqiblarini mag‘lub eta olgan. 12 ta jangni nokaut bilan yakunlagan.

Shohjahon Ergashev esa prof ringdagi 11 ta jangida 11 ta g‘alabaga erishgan va barcha raqiblarini nokaut qilishga erishgan. Ikki yengilmas bokschi o‘rtasidagi to‘qnashuvga Nyu-Yorkdagi Turning Stone Resort Casino in Verona ringi mezbonlik qiladi.

Mazkur jang Toshkent vaqti bilan 13-yanvar tongiga, soat 8:00 ga to‘g‘ri keladi. Bokschining “Daryo”ga ma’lum qilishicha, agar Soni Fredrikson ham mag‘lub etilsa, Shohjahon Ergashev o‘z vazn toifasi reytingida kuchli 10 talikka kirib oladi.