AQShdagi eng keksa ayol 114 yoshida vafot etdi

AQShning eng keksa ayol fuqarosi 114 yoshida vafot etdi, deb yozadi “TASS” Fox News’ga tayanib.

Uning ma’lumotlariga ko‘ra, Adel Danlap o‘zi tug‘ilib-o‘sgan Nyu-Jersi shtatidagi Flemington shahri yaqinida joylashgan kasalxonada olamdan o‘tdi.

1902-yilda Nyuark shahrida tug‘ilgan Danlap turmushga chiqquniga qadar o‘qituvchi bo‘lib ishlagan, so‘ng uch farzandni tarbiyalagan. Adelning turmush o‘rtog‘i sug‘urta kompaniyasida ishlagan, u 1963-yilda vafot etgan.

Danlap hayotligida u bunday yoshgacha yashashga qanday erishganligi to‘g‘risidagi savollarga nima deb javob berishni bilmasligini tan olgan edi. Uning o‘g‘li Erl onasi sog‘lom turmush tarzini olib bormaganini aytdi: U sport bilan shug‘ullanmagan, istagan taomini iste’mol qilgan, ba’zan spirtli ichimliklar ham ichib turgan.

Endilikda Pensilvaniya shtatida yashovchi 113 yoshli Delfin Gibson AQShning eng keksa ayol fuqarosiga aylandi.