Tegmaganga tegindi. Xitoylik erkak chiroyli surat olish ilinjida uxlab yotgan kengurularga tosh otdi

Xitoyning Yanchjou okrugi hayvonot bog‘ida tashrifchilardan biri uxlayotgan kengurularga toshlar uloqtirdi. Erkak kengurular parvozini havoda muhrlash uchun shunday yo‘l tutdi, deya xabar bermoqda Daily Mail.

Hayvonot bog‘ining boshqa tashrifchilari ismi ma’lum qilinmagan erkakni to‘xtatishga urindi, ammo u jonzotlarga nisbatan qo‘pol munosabatda bo‘lganini tan olishni istamadi.

Voqea guvohlari tomonidan olingan suratlar internetda tarqalganidan so‘ng, ijtimoiy tarmoq foydalanuvchilari, OAV vakillari va hayvonlarni himoya qilish tashkilotlari erkakni keskin tanqid qildi.

Hodisaga e’tibor qaratish maqsadida suratlar China Association of Zoological Gardens hayvonot bog‘i assotsiatsiyasiga yuborildi. Xitoylik erkak kengurularga jarohat yetkazgan-yetkazmagani noma’lum.

Quyidagi havola orqali ushbu hodisa aks etgan videoni tomosha qilish mumkin.

“Daryo”ning Telegram’dagi rasmiy kanali — @toshqindaryo’ga a’zo bo‘ling!