“Tibbiyot kollejlariga hozircha qabul yo‘q”. Qashqadaryo viloyati SSB ko‘pchilikni qiziqtirayotgan savolga javob berdi

“Daryo”da “Tibbiyot kollejlari 2019/2020-o‘quv yili uchun o‘quvchi qabul qilmaydimi? Qashqadaryoliklarni shu savol qiynamoqda” sarlavhali maqola e’lon qilingandi. Unda ko‘pchilik qashqadaryoliklar tibbiy ma’lumot olish uchun Tibbiyot kollejlarida qabul boshlanishini kutayotgani, bu borada aniq ma’lumot berilmagani sabab sarson bo‘layotgani haqida so‘z borgandi.

Qashqadaryo viloyat Sog‘liqni saqlash boshqarmasi axborot xizmatining ma’lum qilishicha, Sog‘liqni saqlash vazirligining buyruq va ko‘rsatma xatlari bo‘lmagani sabab qabul jarayoni boshlanmagan.

O‘zbekiston Respublikasi Davlat qabul komissiyasi, O‘zbekiston Respublikasi Oliy va o‘rta maxsus ta’lim vazirligi, O‘zbekiston Respublikasi Sog‘liqni saqlash vazirligining buyruq va ko‘rsatma xatlari bo‘lmaganligi sababli Qarshi tibbiyot kolleji va viloyatdagi boshqa tibbiyot kollejlarida 2019/2020-o‘quv yili uchun fuqarolardan arizalar va hujjatlar qabul qilinmagan.

Qashqadaryo viloyat Sog‘liqni saqlash boshqarmasi axborot xizmati