Yuqori Chirchiqda firibgar sarimsoq piyoz yetishtirgan dehqonni aldab ketdi

Yuqori Chirchiq tumanida mavsumiy dehqonni aldab, uning yetishtirgan sarimsoq piyozini sotib olish va’dasi bilan firibgarlik jinoyatini sodir etgan shaxs aniqlandi. Bu haqda Toshkent viloyati IIB xabar berdi.

Xabar qilinishicha, 2017-yilning 5-iyunida Farg‘ona viloyatida yashovchi 1990-yilda tug‘ilgan Mahsumjon Umidjonov Yuqori Chirchiq tumanida joylashgan dala maydonida mavsumiy dehqonni aldadi. U firibgarlik yo‘li bilan 1966-yilda tug‘ilgan Zokirali Shermatovga 2 820 kilogramm sarimsoq piyozni 3 800 so‘mdan sotib olishini aytib, undan umumiy narxi taxminan 10 716 000 so‘m bo‘lgan sarimsoq piyoz mahsulotlarini olib, pullarini shu kunga qadar bermagan.

Mahsulot egasi pulini ololmagach, ichki ishlar organlariga ariza bilan murojaat etgan. Hozirgi kunda holat yuzasidan tergov harakatlari olib borilmoqda.

“Daryo”ning Telegram’dagi rasmiy kanali — @toshqindaryo’ga a’zo bo‘ling!