Yevgeniy Kasperskiy AQSh Kongressida kompaniyasining aybsizligini isbotlashga urinadi

“Kasperskiy laboratoriyasi” rahbari Yevgeniy Kasperskiy 27-sentabrda o‘tkaziladigan eshituvlarda ishtirok etish uchun AQSh Kongressiga taklif etildi. Bu haqda Vakillar palatasi fan, koinot va texnologiyalar qo‘mitasi ma’lum qildi, deya xabar beradi “RIA Novosti”.

“Taklif uchun minnatdorlik bildiraman va mazkur qo‘mitada ko‘rsatma berishga tayyorman. Tezlashtirilgan tartibda viza ololsam, kompaniyam va uning mahsulotlariga taalluqli ayblovlarga oshkora javob berish niyatidaman”, — deb ta’kidladi Kasperskiy. 

AQSh rasmiylari “Kasperskiy laboratoriyasi”ni Rossiya razvedkasi bilan aloqalarda aybladi va davlat muassasalaridan 3 oy muddatda uning dasturlaridan foydalanishni to‘xtatishni talab qildi. Biroq bu ayblovlarga asos bo‘lgan dalillar keltirilmadi. 

“Kasperskiy laboratoriyasi” ayblovlarni rad etdi va hech qachon hukumat bilan hamkorlik qilmagani, siyosiy vaziyat ta’sirida ilgari surilgan ayblovlarning asossiz ekanligini isbotlovchi ma’lumotlarni taqdim etishini bildirdi. Kompaniya mazkur qaror ustidan shikoyat berishi mumkin.

“Daryo”ning Telegram’dagi rasmiy kanali — @toshqindaryo’ga a’zo bo‘ling!