O‘zbekistonga shimoldan sovuq havo massasi kirib kelmoqda. Havo harorati kechasi 0 darajagacha pasayadi

28—30-sentabr va 1-oktabr kunlari O‘zbekiston hududiga Qozog‘iston Respublikasi va Povoljye orqali Yevropaning Rossiya qismida (Moskva viloyatida) hosil bo‘lgan nam, sovuq havo massasi kirib kelishi kutilmoqda, deb xabar beradi FVV matbuot xizmati.

28—30-sentabr kunlari Respublika hududida vaqti-vaqti bilan yomg‘ir yog‘ishi va shamol tezligining soniyasiga 15-20 metrgacha kuchayishi kutilmoqda.

Havo harorati kunduzi 15—20 daraja iliq, kechasi 3—8 daraja iliq, vaqti-vaqti bilan 0 darajagacha sovushi kutilmoqda.

Respublikaning tog‘ oldi va tog‘li hududlarida sel kelishi xavfi mavjud.

“Daryo”ning YouTube’dagi rasmiy sahifasiga obuna bo‘ling