Nyu-York metrosi vagonidagi kalamush yo‘lovchilarni dahshatga soldi (video)

Nyu-Yorkda metro vagonida yugurayotgan kalamush tufayli tartibsizlik yuzaga keldi. Hodisa aks etgan rolik YouTube’ga joylandi, deb yozadi “RIA Novosti”.

Kadrlarda kalamushning paydo bo‘lganidan cho‘chib ketgan yo‘lovchilarning bir qismi qichqirib o‘rindiqlarga chiqib olganini ko‘rish mumkin. Videoga izoh bergan muallif qichqirayotgan odamlar tufayli kalamushning o‘zi ham dahshatga tushganligi va vagon bo‘ylab yanada tezroq yugura boshlaganligini ta’kidlaydi.

Vagondagi tartibsizlik navbatdagi stansiyagacha davom etgan, stansiyada kalamush ochiq eshikdan chiqib ketishga erishgan.