Vadim Abramov e’tirozini OAV orqali bildirib, xato qilgan. Aybini tan olsa, O‘FF uni kechirishi mumkin

O‘FF qarori bilan Farg‘onaning “Neftchi” klubi bosh murabbiyi Vadim Abramov nomuayyan muddatga futboldan chetlatilgandi. “Gazeta.uz” shu masala yuzasidan O‘FF pozitsiyasini bilishga harakat qildi.

Nomi e’lon qilinmagan O‘FF xodimining nashrga bayon qilishicha, Vadim Abramov o‘zining har qanday e’tirozini aynan O‘FF rahbariyatiga bildirishi kerak edi. Bu ishni mutaxassis OAV orqali amalga oshirib, xatoga yo‘l qo‘ygan. Avvalroq Vadim Abramov “Championat.asia” nashri orqali PFLning yangi — 12 klublik tizimga tezlik bilan o‘tilishini tanqid ostiga olgan bo‘lsa, futboldan chetlatilgach, PFL futbolchilardan talab qilayotgan normativ haqida keskin fikr bildirgandi.

Federatsiyadagi manbaning aytishicha, nomuayyan muddatga futboldan chetlatilgan Vadim Abramov o‘z xatosini tan olib, tashkilot rahbariyatidan uzr so‘rasa, O‘FF uni kechirishi va futbolga qaytarishi mumkin.

Abramov yangi format haqidagi fikrini bayon qilganiga 1,5 oy bo‘ldi. Mana shu orada O‘FF nega qaror chiqarmagani borasida aniq fikrlar yo‘q. Qolaversa, Abramovdan keyin “So‘g‘diyona” bosh murabbiyi Igor Shkvirin, “Dinamo” ustozi Oleg Tyulkin ham keskin qaror borasida tanqidiy fikr bildirgandi.

“Neftchi” ustozi O‘FFda bo‘lib o‘tgan klub murabbiylari ishtirokidagi majlisdan so‘ng futboldan chetlatildi. O‘sha majlis va chetlatish haqidagi qaror orasidagi vaqt ichida Vadim Abramov OAV bilan suhbatda bo‘lmagan. Murabbiyning o‘zi ham nima sababdan chetlatilgani masalasidagi savolga O‘FFdagi yig‘ilish masalasi bilan javob qaytargan.