“Koinot go‘zali 2018”ning o‘zbekistonlik ishtirokchisi 10 yil avval Toshkentdagi birinchi go‘zallik tanlovida qatnashgan (foto)

Jurnalist Maqsad Jangirov O‘zbekistondagi birinchi va yagona go‘zallik tanlovi — Model of the World in Uzbekistan 2008 ga tayyorgarlik ko‘rish jarayoni aks etgan suratlar bilan bo‘lishdi.

“Toshkentlik qiz “Koinot go‘zali 2018” xalqaro go‘zalli tanlovining 1/8 finali ishtirokchisiga aylangani haqida ma’lumot paydo bo‘ldi. Uning yuzi tanish tuyuldi. Arxivlarni kovlab ko‘rdim. Topdim. 2008-yil, Toshkent. O‘zbekistondagi birinchi va yagona go‘zallik tanlovi — Model of the World in Uzbekistan 2008”, — deb yozdi jurnalist Facebook’dagi sahifasida.

“Tashkilotchilar ko‘rmay turgan paytda bir nechta kadrlar olishga ulgurdim. O‘sha vaqtda modellarga nisbatan noto‘g‘ri fikrda bo‘lishardi, men esa ular holi-joni qolmay charchaguncha ishlaganini ko‘rdim… Ularga nisbatan hurmatim oshdi. Oradan o‘n yil o‘tdi… ammo ular o‘zlarini bu eski fotosuratlarda taniy oladimi? ‘Koinot go‘zali 2018’ tanlovining toshkentlik ishtirokchisi o‘zini tanib olarmikan?” — deya jurnalist suratlarni ilova qildi.

“O‘zbekistonni sevadiganlar uchun” deb nomlangan guruhga joylangan post ostida mavzu qahramoni — Aziza Nurmuhammedova o‘z izohini qoldirdi va o‘zini taniganini bildirdi.