O‘zbekistonda uzoq hududlardan kelgan akademik litsey o‘quvchilari uch mahal imtiyozli ovqatlantiriladi 

Adliya vazirligida akademik litseylarda imtiyozli ovqatlantirishni tashkil qilish hamda xarajatlarini qisman qoplash uchun ota-onalar to‘lovini to‘lash tartibi to‘g‘risidagi nizom davlat ro‘yxatidan o‘tkazildi.

Nizomga ko‘ra:

Akademik litseylardan uzoq hududlardan qabul qilingan o‘quvchilar (doimiy yashash joyi boshqa tumanda (shaharda) bo‘lgan, litsey yotoqxonasida yoki boshqa turar joylarda ijara asosida yashaydigan o‘quvchilar) uch mahal imtiyozli ovqatlantiriladi;

O‘quvchilarni imtiyozli ovqatlantirish xarajatlarini qoplashga ularning ota-onalari bir oy uchun eng kam ish haqining bir barobari miqdorida to‘lov amalga oshiradi. Xarajatlarning qolgan qismi davlat byudjeti mablag‘lari hisobidan qoplanadi;

Ijara asosida yashaydigan o‘quvchilar ularning ota-onalari murojaatlariga asosan faqat bir mahal, ya’ni tushlikdan foydalanishi ham mumkin. Bunda bir oyga to‘lov eng kam oylik ish haqining 50 foizi miqdorida bo‘ladi;

Akademik litsey yotoqxonasida yashaydigan yoki boshqa turar joylarda ijara asosida yashaydigan o‘quvchilar ro‘yxati har o‘quv yilining 10-sentabridan kechiktirmasdan litsey ma’muriyati tomonidan shakllantirilib, direktor buyrug‘i bilan tasdiqlanadi va o‘quvchilarga imtiyozli ovqatlanish kartochkasi beriladi.