O’zbekiston Prezidentining vakili “ShHT—Afg‘oniston” Aloqa guruhining Pekin shahridagi majlisida ishtirok etdi

2018-yilning 28-may kuni O‘zbekiston Prezidentining Afg‘oniston bo‘yicha maxsus vakili Ismatulla Irgashev boshchiligidagi delegatsiya Pekin shahrida “ShHT—Afg‘oniston” Aloqa guruhining tashqi ishlar vazirlari o‘rinbosarlari darasidagi majlisida ishtirok etdi. Bu haqda TIV matbuot xizmati xabar berdi.

Shanxay hamkorlik tashkilotiga a’zo davlatlar va Afg‘oniston delegatsiyalari tomonidan hamkorlikning dolzarb masalalari muhokama qilindi, Afg‘onistondagi vaziyat va uning ulkan qo‘shni mintaqaga ta’siri hamda Afg‘oniston muammosini hal qilish bo‘yicha choralar yuzasidan fikr almashildi.

O‘zbekiston delegatsiyasi rahbari o‘z nutqida majlis ishtirokchilariga 2018-yil 27-mart kuni Toshkent shahrida o‘tkazilgan Afg‘oniston bo‘yicha “Tinchlik jarayoni, xavfsizlik sohasida hamkorlik va mintaqaviy sheriklik” konferensiyasi natijalari to‘g‘risida ma’lumot berdi.

Ta’kidlanganidek, Afg‘onistondagi vaziyat hal bo‘lishiga ko‘maklashish, tinchlik va barqarorlik o‘rnatish, mazkur qo‘shni va qardosh davlat bilan do‘stona aloqalarda bo‘lish va rivojlantirish Shavkat Mirziyoyev rahbarligidagi O‘zbekiston tashqi siyosatining bosh ustuvor yo‘nalishlaridan biri hisoblanadi.

O‘zbekiston bundan keyin ham Afg‘onistondagi vaziyatni barqarorlashtirish va uni rivojlanish yo‘liga qaytarishga amaliy hissa qo‘sha oladigan barcha sa’y harakatlarni qo‘llab-quvvatlashga tayyor ekanligi ta’kidlandi.