Jorj Soros Xiaomi aksiyalarini sotib oldi

Xitoyning smartfonlar ishlab chiqaruvchi Xiaomi kompaniyasi Gonkong birjasida aksiyalarini sotuvga chiqardi va 4,7 milliard dollar jalb qilishga muvaffaq bo‘ldi. Kompaniyaning yangi investorlaridan biri amerikalik milliarder Jorj Soros bo‘ldi. Bu haqda Bloomberg xabar berdi.

Kompaniya har birining qiymati 2,17 dollar bo‘lgan 2,18 milliard dona aksiyasini sotishga muvaffaq bo‘lgan. Kompaniyaning umumiy qiymati ayni paytda 54 milliard dollarga baholanmoqda.

Xiaomi aksiyalarini xarid qilgan investorlar orasida amerikalik milliarder Jorj Soros va Xitoyning Hillhouse Capital investitsion kompaniyasi bor. Bloomberg ma’lumotlariga ko‘ra, Sorosning fondi aksiyalarning kichik paketini xarid qilish bilan cheklangan.