O‘zbekiston neft qazishni kamaytirib, benzin ishlab chiqarishni ko‘paytirdi

O‘zbekiston neft qazishni kamaytirib, benzin ishlab chiqarishni ko‘paytirishda davom etmoqda. Bu haqda Statistika qo‘mitasi ma’lumotlariga tayanib, Spot xabar berdi.

2018-yilning yanvar-iyun oylarida O‘zbekiston 375,2 ming tonna neft qazib olgan. Bu 2017-yil ko‘rsatkichiga nisbatan 9,7 foizga kamroqdir. 2017-yili mamlakatda 415,5 ming tonna neft qazilgan.

Benzin ishlab chiqarish hajmi 3,1 foizga, dizel yoqilg‘isi hajmi 17,9 foizga ortgan.

Ko‘mir qazib olish hajmi keskin kamaygan. 2017-yili 1,98 million tonna ko‘mir olingan bo‘lsa, 2018-yili bu ko‘rsatkich 1,68 million tonnani tashkil qilgan. Ya’ni, ko‘mir hajmi 14,8 foizga qisqargan.

Qazib olinayotgan gaz hajmi ortishda davom etmoqda. 2017-yilga nisbatan o‘sish surati 6,3 foizni tashkil qilgan. Umumiy miqdorda 24 461,1 million metr kub gaz olingan.

Avvalroq, Rossiya O‘zbekistonga sinov tarzida neft yetkazib berishni to‘xtatgani xabar qilingan edi.