Oliy ta’lim vaziri birinchi o‘rinbosari O‘zbekiston sport vaziri etib tayinlandi

Dilmurod Nabiyev O‘zbekiston jismoniy tarbiya va sport vaziri etib tayinladi. Bu haqda, hukumatdagi manbasiga asoslanib, “Gazeta.uz” xabar bermoqda.

Nabiyev ushbu lavozimda Shoakram Isroilovni almashtirdi — Isroilov o‘tgan chorshanba kuni vazirlik jamoasi bilan xayrlashgan edi.

Ushbu tayinlovga qadar Dilmurod Nabiyev 2017-yil iyunidan beri oliy va o‘rta maxsus ta’lim vaziri birinchi o‘rinbosari lavozimida ishlab kelayotgan edi.

Nabiyev 2014—2016-yillarda O‘zbekiston Prezidentining fan, ta’lim, sog‘liqni saqlash va sport masalalari bo‘yicha Davlat maslahatchisi o‘rinbosari, 2016—2017-yillarda esa Vazirlar Mahkamasining ta’lim, fan va yoshlar siyosati masalalari bo‘yicha axborot-tahlil bo‘limi boshlig‘i bo‘lib ishlagan.