Tojik shoiri va faylasuf olim Jaf’ar Muhammad ijodiga bag‘ishlangan badiiy kecha bo‘lib o‘tdi

Vazirlar Mahkamasi huzuridagi Millatlararo munosabatlar va xorijiy mamlakatlar bilan do‘stlik aloqalari qo‘mitasida tashkil etilgan ma’rifiy kecha o‘zbek va tojik xalqlarining azaliy do‘stligini tarannum etib kelayotgan shoir, tarjimon, faylasuf olim Jaf’ar Muhammad ijodiga bag‘ishlandi, deb yozadi O‘zA.

Badiiy kechada taniqli ijodkorlar va san’at ustalari, Respublika tojik milliy madaniy markazining faollari ishtirok etdi.

Vazirlar Mahkamasi huzuridagi Millatlararo munosabatlar va xorijiy mamlakatlar bilan do‘stlik aloqalari qo‘mitasi raisi R.Qurbonov va boshqalar Markaziy Osiyoda qadimdan birga yashab kelayotgan o‘zbek va tojik xalqlari o‘rtasidagi adabiy, ilmiy-madaniy hamkorlik azaldan mustahkam asoslarga ega ekanini ta’kidladi.

Ijodiy kechada Jaf’ar Muhammad ijodidan namunalar o‘qilib, san’atkorlar tomonidan o‘zbek va tojik kuy-qo‘shiqlari ijro etildi.