Farg‘ona shahri va Farg‘ona tumani hokimlari lavozimidan ozod etildi

15-oktabr kuni Farg‘ona viloyatida birdaniga ikki hudud — Farg‘ona shahri va tumani hokimlari lavozimidan ozod etildi. Bu haqda Farg‘ona viloyati hokimi Shuhrat G‘aniyev viloyat faollari bilan o‘tkazilgan selektor yig‘ilishida ma’lum qildi.

“Daryo” manbasining ma’lum qilishicha, Farg‘ona tumani hokimi Sodiqjon Qodirovich Imomaliyevning ishdan olinishi qishloq xo‘jaligi ishlariga sustkashlik bilan yondashgani, ayrim yer maydonlarining noqonuniy ajratilishi holatlarining mavjudligi kabi sabablar bilan bog‘lanmoqda. Viloyat hokimi Shuhrat G‘aniyev selektor yig‘ilishida ushbu tuman hokimi faoliyatini tanqid qilgan.

Farg‘ona shahri hokimi Shavkat Shokirovich Erkaboyev esa shaharni ijtimoiy-iqtisodiy rivojlantirish borasida jiddiy kamchiliklarga yo‘l qo‘ygani uchun lavozimidan ozod etilgani ma’lum qilindi.