Afg‘onistonda portlash oqibatida 40 kishi halok bo‘ldi

Afg‘oniston poytaxti Kobulda yuz bergan portlash oqibatida 40 kishi halok bo‘ldi, 80 kishi jabrlandi. Bu haqda Tolo News telekanali xabar bermoqda, deb yozadi “RIA Novosti”.

Portlash shahar markazida Muhammad payg‘ambar (s.a.v.) tug‘ilgan kuni sharafiga bayram o‘tkazilayotgan zalda yuz bergan. 40 kishi portlash qurboniga aylangan, 80 nafar odam jarohat olgan. Dastlabki ma’lumotlarga ko‘ra, portlash xudkush tomonidan amalga oshirilgan.

“Kobuldagi portlash joyidan 45 nafar yarador shifoxonalarga yetkazilgan”, — deyiladi mamlakat sog‘liqni saqlash vazirligi bayonotida.