Jambildagi YTH oqibatida jabrlangan fuqarolardan yana biri vafot etdi

Qozog‘istonda yuz bergan va bir necha O‘zbekiston fuqarosi halok bo‘lgan YTH jabrlanuvchilaridan yana biri Olmaota shahridagi shifoxonada vafot etdi, deb xabar berdi Sputnik.

“Kuni kecha 23-aprel kuni hayot uchun xavfli bo‘lgan jarohatlar bilan, og‘ir ahvolda shifoxonaga olib kelingan bemorlardan biri vafot etdi. U o‘ziga kelmay hayotdan ko‘z yumdi”, — deyiladi shifoxona xabarida.

Ma’lumot uchun, Qozog‘istonning Jambil viloyati Qorday tumanidagi “Toshkent—Olma-ota” trassasining 181-kilometrida 20-aprel shanba kuni mahalliy vaqt bilan tonggi soat 05:09 da 49 nafar yo‘lovchini olib ketayotgan Van Hool rusumli avtobus ishtirokida yo‘l-transport hodisasi ro‘y bergan edi.

Shu tariqa ushbu mudhish YTHda halok bo‘lganlar soni 12 kishiga yetdi.