Turkmaniston prezidenti ot haqida rep kuyladi (video)

Turkmaniston prezidenti Gurbanguli Berdimuhamedov 2019-yilning birinchi kunida tug‘ilgan “Rivoj” laqabli axaltaka toychog‘i haqida rep qo‘shiq ijro etdi. Bu haqda “RIA Novosti” xabar berdi.

Turkmaniston rahbari o‘zi yozgan qo‘shiq bilan xalqaro ot sporti majmuasida turkman oti milliy bayrami sharafiga o‘tkazilgan ot choptirishda chiqish qilgan.

Qo‘shiqda toychoq butun mamlakat uchun farovonlik darakchisi va ilhom manbai ekani haqida kuylangan.

2018-yilning iyulida ta’tilga chiqqan Berdimuhammedov nevarasi Karimguli bilan birga o‘zini ilk marta rep-ijrochilikda sinab ko‘rgan edi. O‘shanda u o‘z qo‘shig‘ini “Amul-Xazar” xalqaro avtorallisiga bag‘ishlagan edi.