Venesuela razvedkasi Guaydoning o‘rinbosarini qo‘lga oldi

Venesuela muxolifat parlamenti yetakchisi Xuan Guaydo razvedka xodimlari o‘zining o‘rinbosari Edgar Sambranoni qo‘lga olganini ma’lum qildi, deb xabar beradi Reuters.

Ta’kidlanishicha, bu Venesuelada 30-aprel kuni davlat to‘ntarishini amalga oshirishga uringan harakatdan keyingi birinchi hibs hisoblanadi.

Guaydo parlamentining vitse-spikeri o‘zining Twitter’dagi sahifasida mashinasini Bolivarian razvedka xizmati SEBIN xodimlari qurshab olganini yozgan. Ular Sambrano o‘tirgan avtomobilni Karakasdagi bazalardan biriga ko‘chirish uchun evakuatordan foydalangan.

Eslatib o‘tamiz, 30-aprel kuni Venesuela muxolifati davlat to‘ntarishini amalga oshirgan, biroq muvaffaqiyatsizlikka uchragan edi.