Janubiy Koreyadagi kvartirada yuz bergan yong‘inda halok bo‘lgan o‘zbekistonlik talabaning jasadi Toshkentga keltirildi

Janubiy Koreyaning Seul shahridagi kvartirada joriy yil 9-may kuni sodir bo‘lgan yong‘in oqibatida halok bo‘lgan o‘zbekistonlik Farrux Mo‘minovning jasadi Toshkentga jo‘natildi. Bu haqda TIV matbuot xizmati xabar bermoqda.

Yong‘in chog‘ida ikkinchi darajali kuyish olgan talaba Mutal Yo‘ldoshev “Hanil” kasalxonasiga joylashtirilgan, unga malakali tibbiy yordam ko‘rsatilmoqda. 11-may kuni jabrlanuvchining otasi va akasi Seul shahriga yetib keldi. M.Yo‘ldoshev ta’lim olgan “Hankuk” universiteti ko‘magida ularga yashash joyi borasida va boshqa masalalarni hal qilishda yordam ko‘rsatildi.

Hozirda Janubiy Koreya tomoni yong‘in sabablarini aniqlash uchun tergov harakatlarini davom ettirmoqda.