Saakashvili Zelenskiyga yordam berish uchun Ukrainaga qaytganini ma’lum qildi

Gruziya sobiq prezidenti Mixail Saakashvili Ukrainaga prezident Vladimir Zelenskiyga yordam berish niyatida qaytganini ma’lum qildi, deb xabar beradi “Korrespondent.net”.

“Rejam — Zelenskiy jamoasiga har tomondan maslahat, tarjibam bilan yordam berish. Chunki ushbu prezidentning muvaffaqiyati butun mamlakat muvaffaqiyatidir”, — deydi Saakashvili.

Uning ta’kidlashicha, Zelenskiyga prezident lavozimidagi ishida muvaffaqiyatsizlikka uchrashiga yo‘l qo‘ymaslik lozim.

Saakashvilining so‘zlariga ko‘ra, u hech kimdan qasos olish niyatida emas, chunki uning qo‘lidan “faqatgina qurish” keladi. Shu bilan birga siyosatchi oldingi prezident jamoasi vakillari qonun oldida javob berishlariga umid qilmoqda.

Eslatib o‘tamiz, 28-may kuni Vladimir Zelenskiy Mixail Saakashviliga Ukraina fuqaroligini qaytarib bergandi.