Uber havo taksi xizmati sinovdan o‘tkaziladigan uchinchi shahar nomini e’lon qildi

Amerikaning Uber kompaniyasi Melburn shahri havo taksilar xizmati sinovdan o‘tkaziladigan dunyodagi uchinchi shaharga aylanishini ma’lum qildi, deb xabar beradi “RIA Novosti”.

Uber Air’ning sinov versiyalari Dallas va Los-Anjelesda ham ishga tushib, aeroportlarni shahar markazi bilan bog‘lovchi transport tugunlarini birlashtirishi kutilmoqda.

Ta’kidlanishicha, sinov parvozlari 2020-yilda boshlanadi, tijoriy operatsiyalar esa 2023-yilga kelib amalga oshiriladi.

“Avstraliya hukumati raydshering va kelajak texnologiyalariga istiqbolli yondashuvni amalga oshirdi… Avstraliyaning boshqa shaharlari ham bunga ergashishiga guvoh bo‘lamiz”, — deydi Uber menedjeri Syuzan Anderson.

Uchar taksilar xizmatini 2028-yili Los-Anjelesda o‘tkaziladigan Olimpiada o‘yinlariga qadar ishga tushirish rejalashtirilgan.

Uber — taksini sayt yoki mobil dastur orqali buyurtma qilish imkonini beruvchi onlayn servis hisoblanadi. Kompaniya 2009-yilda tashkil etilgan bo‘lib, uning shtab-kvartirasi San-Fransiskoda joylashgan.