Toshkentga “Front orti qahramon shahri” nomini berish taklif qilindi

“TASS” bosh direktorining birinchi o‘rinbosari Mixail Gusman MGIMO bitiruvchilarining V xalqaro forumidagi chiqishi davomida Toshkentga “Front orti qahramon shahri” nomini berishni taklif qildi. Bu haqda “Podrobno.uz” xabar bermoqda.

“Fashizm ustidan g‘alaba uchun muhim hissa qo‘shgan qahramon shaharlar bor. Ammo kamida ikki shaharga ‘Front orti qahramon shahri’ nomini berish zarur deb o‘ylayman. Bu Toshkent va Boku. Ular bu nomga munosib”, — dedi Gusman.

Gusmanning aytishicha, urush yillari turli millatga mansub 1 milliondan ortiq kishi Toshkent va uning atrofida jon saqlagan, 113 ta gospital faoliyat ko‘rsatgan, yuz minglab askar va zobit bu yerda davolanib, safga qaytgan.