Xitoy rasmiy vakili: Pekin Tayvan bilan tinch yo‘l orqali birlashishga sodiqligini saqlab qoladi

Xitoy Tayvan bilan tinch yo‘l orqali birlashish tarafdori, biroq hech qachon uning mustaqilligiga yo‘l qo‘ymaydi. Bu haqda Xitoy davlat kengashi Tayvan ishlari bo‘yicha devonxonasi rasmiy vakili Ma Syaoguan ma’lum qildi, deya xabar beradi “TASS”.

“Biz tinch yo‘l bilan birlashishga jon-jahd va samimiylik bilan intilishga sodiqligimizni saqlab qolamiz, biroq mustaqil Tayvan tarafdorlariga uni Xitoydan ajratishga hech qachon yo‘l qo‘ymaymiz. Xitoy va Tayvan yagona mamlakatga mansub”, — deya ta’kidladi Ma Syaoguan.

Rasmiy vakil yana bir bor mamlakatning 1992-yil konsensusiga sodiqligini bildirdi. Mazkur konsensusga ikki tomonning “yagona Xitoy” tamoyilini tan olishi asos bo‘lib xizmat qiladi.