Fransiya kompaniyasi Samarqandda fotoelektrostansiya qurish uchun 150 mln yevro investitsiya kiritadi

Fransiyaning Total Eren kompaniyasi Samarqand viloyatida davlat-sherikchilik asosida umumiy quvvati 100 megavattli fotoelektrostansiya qurish uchun 150 million yevro investitsiya kiritadi. Bu haqda Investitsiyalar va tashqi savdo vazirligi matbuot xizmati ma’lum qildi.

13-sentabr, juma kuni Investitsiyalar va tashqi savdo vazirligi nomidan Sardor Umrzoqov va Fransiyaning Total Eren kompaniyasi nomidan kompaniya ijrochi vitse-prezidenti Fabiyen Demol o‘rtasida Samarqand viloyatida davlat-sherikchilik asosida umumiy quvvati 100 megavattli fotoelektrostansiya qurish to‘g‘risida investitsion kelishuv imzolandi.

Total Eren loyihaning butun muddati — 25 yil davomida elektr stansiyasini loyihalashtirish, moliyalashtirish, qurish va ekspluatatsiya qilishni amalga oshiradi. Qurilish ishlari 2020-yilning birinchi choragida boshlanib, 2021-yilning birinchi choragida foydalanishga topshirilishi kutilmoqda.

Ma’lumot uchun, mazkur kompaniya qayta tiklanadigan energiya sohasidagi dunyoda yetakchi bo‘lgan kompaniyalardan biridir.

Eslatib o‘tamiz, O‘zbekiston 2018-yilda Samarqand viloyatining Pastdarg‘om tumanida Xitoy kompaniyasi tenderda g‘olib chiqqan quvvati 100 megavattli quyosh stansiyasi qurilishini to‘xtatgandi.