Telegram’da audioqo‘ng‘iroqlarni qanday ishga tushirish mumkin?

30-mart kuni Telegram’da ovozli qo‘ng‘iroqlar funksiyasi paydo bo‘ldi, deb yozadi TJournal. Dastlab ular faqat G‘arbiy Yevropa foydalanuvchilari uchun mo‘ljallangani, boshqa mamlakatlarda esa undan bir necha kundan keyin foydalanish mumkin bo‘lishi aytilgandi.

Ammo qo‘ng‘iroqlarni hozirning o‘zidayoq ishga tushirish mumkin, deb yozadi nashr. Funksiya to‘g‘ri ma’noda virus kabi tarqalmoqda. Agar tanishlaringizdan birortasida qo‘ng‘iroqlar funksiyasi ishlayotgan bo‘lsa, undan sizga qo‘ng‘iroq qilishni so‘rang, shunda sizda ham bu funksiya ishga tushadi. Faqat, dasturning so‘nggi versiyasini o‘rnatishingiz kerak, aks holda sizga qo‘ng‘iroq qilisha olmaydi.

Telegram qisqa vaqt ichida faqat 50 marta qo‘ng‘iroq qilish imkonini beradi, shundan so‘ng ushbu imkoniyatni bloklab qo‘yadi — bu, ehtimol vaqtinchalik bo‘lishi mumkin. Ammo, shu tariqa, foydalanuvchilar yangi funksiyaning virusli reklamasida ishtirok etish bilan birga, uni biryo‘la sinovdan ham o‘tkazmoqda: bu — oqilona reklama yo‘li, deyiladi xabarda.