Dubayda Burj Xalifa yaqinida qurilayotgan binoda yong‘in sodir bo‘ldi

Dubayda dunyodagi eng baland Burj Xalifa osmono‘pari yaqinida qurilayotgan 60-qavatli Address Residence Fountain Views turar-joy majmui hududida yong‘in chiqdi. Bu haqda “RIA Novosti” xabar bermoqda.

Alangalanish 2-aprel, yakshanba kuni mahalliy vaqt bilan taxminan 5:30 da boshlangani bildirilmoqda. Bino yaqinida Dubai Mall savdo kompleksi va yangi yil arafasida yirik yong‘in kelib chiqqan Address Hotel mehmonxonasi joylashgan.

“Voqea joyiga tez tibbiy yordam mashinalari yuborildi. Jabrlanganlar haqida hozircha ma’lumot berilmadi”, — deyiladi Dubay mediamarkazi xabarida.

Favqulodda xizmatlar yong‘in bartaraf etilgani, o‘t o‘chiruvchilar alangalanish joyida ishni davom ettirayotganini ma’lum qildi. Shahar rasmiylari yaqin atrofdagi ko‘chalarda harakatlanishni to‘xtatdi. “Daryo”ning Telegram’dagi rasmiy kanali — @toshqindaryo’ga a’zo bo‘ling!