Putin: Internetda erkinlik hech qayerda yo‘q

Rossiya prezidenti Vladimir Putin Xitoydagi internetni tartibga solishning taqiqlovchi modelini tanqid qilmaslikka chaqirdi. Bu haqda Meduza xabar bermoqda.

“Internetda tartibga solinmagan yarim erkinlik hech qayerda yo‘q”, — dedi davlat rahbari Umumrossiya xalq fronti media-forumida.

Internetda tarqalayotgan axborot ustidan nazoratni kuchaytirish zaruriyati haqida berilgan savolga javoban Putin amaldagi choralar yetarli ekanligini ma’lum qildi.

“Bizda cheklovlar bor, ular yaxshigina ma’lum — bular hudkushlikni targ‘ib qilish, bolalar pornografiyasi, terrorchilik targ‘iboti, giyohvand moddalar tarqatilishi va boshqalar. Bularning barchasi (cheklovlar) amal qilmoqda”, — dedi prezident.

Putin internetda “nimalar taqiqlanmagan bo‘lsa, barchasi mumkin”ligini aytdi.

Ma’lumot o‘rnida, Rossiya va Xitoy 2015-yilda “xalqaro axborot xavfsizligini ta’minlash” uchun hamkorlik to‘g‘risida bitim imzolagan. Mazkur hujjat axborot almashinuvini tartibga solishda tajriba va texnologiyalar almashishni nazarda tutadi.

“Daryo”ning Telegram’dagi rasmiy kanali — @toshqindaryo’ga a’zo bo‘ling!