Rossiyadagi bankomatlarga o‘zbek va tojik tillari kiritildi

Rossiyaning “Sberbank” bankiga tegishli bankomatlarning 80 foizdan ortig‘ida mijozlarga o‘zbek va tojik tillarida xizmat ko‘rsatish boshlandi. Bu haqda “Vedomosti.ru” xabar berdi.

Ma’lum qilinishicha, bankomatlar orqali o‘zbek va tojik tillarida naqd pul olish, hisobdagi pul-mablag‘larini tekshirish hamda mobil aloqa vositalariga to‘lovlar kabi xizmatlar taklif qilinmoqda.

Shuningdek, bank ofislarida xorijiy fuqarolar orasida ommabop bo‘lgan moliyaviy mahsulotlar taqdimotlari ingliz, o‘zbek va tojik tillarida o‘tkaziladi.

Bank tomonidan ta’kidlanishicha, xorijiy fuqarolar bank mahsulotlari va xizmatlaridan faol tarzda foydalanadi. Xizmatlarni mijozlarning ona tillarida taklif qilish ular va bank orasidagi munosabatlarni yanada yaqinlashtiradi.