Surxondaryoda qator ichki ishlar xodimlari ishdan bo‘shatildi 

20-yanvar, dushanba kuni Surxondaryo viloyati Ichki ishlar boshqarmasida ichki ishlar organlari tomonidan 2019-yilning 12 oyi davomida amalga oshirilgan ishlar va yo‘l qo‘yilgan xato va kamchiliklarga bag‘ishlangan yig‘ilish bo‘lib o‘tdi. Bu haqda Surxondaryo viloyati IIB axborot xizmati xabar berdi.

Qayd etilishicha, viloyat IIB boshlig‘i, polkovnik Abduvohid Ismoilov yig‘ilganlarni kun tartibidagi masalalar bilan tanishtirib o‘tdi. Shundan so‘ng O‘zbekiston ichki ishlar vazirining o‘rinbosari, general mayor Azizbek Ikromov so‘z oldi.

Tahlillar asosida mas’ul rahbarlarning hisobotlari tinglanib, muhokama natijalariga ko‘ra, xizmat vazifalarini bajarishda muntazam kamchiliklarga yo‘l qo‘yib kelgan bir qator rahbar, xodimlarga, hududiy profilaktika inspektorlariga nisbatan tegishli intizomiy choralar qo‘llanilib, ayrimlari egallab turgan lavozimidan ozod etildi, ba’zilari esa ichki ishlar organlari safidan bo‘shatildi.

Yig‘ilish so‘ngida general mayor Aziz Ikromov har bir xodim xizmat intizomi va qonuniylikka qat’iy amal qilishi lozimligi, quyi tizimdan, ya’ni mahallada faoliyat olib borayotgan profilaktika inspektori bilan kunlik faoliyatini olib borishi, huquqbuzarlik va jinoyatchilikka qarshi kurashish, uning barvaqt oldini olishni mahalladan boshlashi kerakligi to‘g‘risida ta’kidlab o‘tdi.