O‘zbekistonda sog‘liqni saqlash sohasiga qancha mablag‘ ajratilishi ma’lum qilindi

Moliya vazirligi sog‘liqni saqlash sohasini moliyalashtirishga davlat budjetidan ajratilgan mablag‘lar to‘g‘risida ma’lumot berdi.

Qayd etilishicha, 2016-yilda davlat budjeti parametrlarida sog‘liqni saqlash sohasiga 6 trillion so‘m ajratilgan bo‘lsa, ushbu ko‘rsatkich 2020-yilda 14,8 trillion so‘mni tashkil etishi rejalashtirilmoqda (2016-yilga nisbatan qariyb 2,5 baravar yoki 2019-yilga nisbatan 1,23 barobar ko‘proqdir).

Shuningdek, 2020-yilda dori vositalari va tibbiyot buyumlarini xarid qilishga 1 491,8 milliard so‘m ajratish nazarda tutilgan (2016-yilga nisbatan esa 6,5 barobarga yoki 2019-yilga nisbatan qariyb 36 foizga ko‘proqdir).

Sog‘liqni saqlash sohasiga ajratilgan mablag‘larning ayrim faoliyat turlari kesimida ko‘rinishi quyidagicha:

a) shoshilinch tibbiy yordam muassasalarining dori vositalari va tibbiy buyumlar xarajatlari uchun 2020-yilda 102,8 milliard so‘m ajratilishi ko‘zda tutilayotgan bo‘lsa, 2016-yilda 16,3 milliard so‘m ajratilgan;

b) sog‘liqni saqlash sohasining eng og‘ir nuqtalaridan biri bo‘lgan onkologiya muassasalarida davolanadigan har bir bemorning bir kunlik dori vositalari va tibbiy buyumlari bilan ta’minlash xarajatlari uchun budjet mablag‘lari 2016-yildagi 3 250 so‘mdan 2020-yilda 66 227 so‘mgacha oshirildi;

v) aholiga tez tibbiy yordam xizmati uchun har bir chaqiruvga 2016-yilda o‘rtacha 482 so‘mdan ajratilgan bo‘lsa, 2020-yilda bunday xarajat turi uchun 6 700 so‘mdan ajratilishi ko‘zda tutilmoqda.