Yunusobod tumanida issiqlik ta’minoti uzildi

Bugun, 23-yanvar kuni Toshkent shahar Yunusobod tumani Uch qahramon va  Yunus ota ko‘chalaridan o‘tgan issiqlik quvurlarida nosozlik yuzaga keldi, deb xabar bermoqda Toshkent shahar hokimligi matbuot xizmati “Toshissiqquvati”ga tayanib.

Oqibatda Yunusobod tumanining 9 ta mavzesi — Yunusobod-7, 8, 9, 10, 12, 15, 16, 18, 19 mavzelarida istiqomat qiluvchi iste’molchilar vaqtinchalik issiq suv va issiqlik energiyasidan uzildi.

Qayd etilishicha, hozirda nosozlikni tezkor ravishda bartaraf etish ishlariga zarur maxsus texnika va mutaxassislar jalb qilingan bo‘lib, issiqlik ta’minoti mazkur hududlarda tez orada tiklanadi.