Kaliforniyada koronavirus sabab favqulodda holat rejimi e’lon qilindi

Amerikaning Kaliforniya shtatida koronavirus sabab favqulodda holat rejimi e’lon qilindi. Bu haqda shtat gubernatori Gevin Nyusga tayanib Los Angeles Times nashri xabar berdi.

“Ushbu qaror nafaqat bir kishining fojiaviy o‘limi, balki boshqa vaziyatlar sabab qabul qilindi”, — deydi gubernator. Uning ta’kidlashicha, bu kabi chora-tadbirlar kasallik tarqalishiga qarshi kurashish uchun federal zaxiradan mablag‘ olish zarurati bilan bog‘liq.

4-mart kuni Pleyser okrugida (Kaliforniya shtati) koronavirus infeksiyasi oqibatida vafot etish bo‘yicha birinchi holat qayd etildi. Kasallik sog‘lig‘ida muammo bo‘lgan keksa odamda aniqlangan. U 11—21-fevral kunlari San-Fransiskodagi sayohat kemasida bo‘lgan vaqtida kasallikni yuqtirib olgan bo‘lishi mumkin.

Mavzuga doir:

Eslatib o‘tamiz, 1-mart kuni Vashington shtati gubernatori Jey Insli koronavirus infeksiyasi bilan kasallangan birinchi bemor vafotidan keyin hududda favqulodda holat e’lon qilgandi. 4-mart holatiga ko‘ra, AQShda koronavirus keltirib chiqargan pnevmoniya bilan kasallangan bemorlar soni 128 nafarga yetgan. Ularning asosiy qismi Vashington va Kaliforniya shtatida qayd etilgan.