AQSh harbiylari “barcha bombalarning onasi”dan Trampning ruxsatisiz ham foydalanishi mumkinligi ma’lum bo‘ldi

Associated Press’ning Pentagondagi manbalarga asoslanib xabar berishicha, Afg‘onistondagi jangarilar marrasiga noyadroviy GBU-43/B bombasini tashlash haqida buyruq bergan AQSh armiyasi generali Jon Nikolsonda buning uchun AQSh prezidenti Donald Trampdan ruxsat olish zarurati bo‘lmagan. Bu haqda “Kommersant” xabar bermoqda.

Agentlik suhbatdoshlarining ma’lum qilishicha, general Nikolson “barcha bombalarning onasi”dan foydalanish haqida buyruq berish uchun barcha vakolatlarga ega. Ularning so‘zlariga ko‘ra, bombadan foydalanilgani jamoatchilik e’tiborini tortgan, biroq u yo‘q qilgan marra ko‘lami “harbiy miqyosda unchalik ham e’tiborga molik emas”.

CNN telekanali ma’lumotlariga ko‘ra, Jon Nikolson mazkur bombadan foydalanishni “taktik qadam” deb baholagan. Shuningdek, uning qayd etishicha, Afg‘oniston rahbariyati bu bombadan foydalanish uchun ruxsat bergan.

“Daryo”ning Telegram’dagi rasmiy kanali — @toshqindaryo’ga a’zo bo‘ling!