Yana 31 nafar bemor koronavirusdan tuzaldi. O‘zbekistonda sog‘ayganlar soni 892 nafarga yetdi

O‘zbekiston Sog‘liqni saqlash vazirligi Qoraqalpog‘iston Respublikasi yuqumli kasalliklar shifoxonasida 21 nafar koronavirus infeksiyasiga chalingan bemorning hamda Toshkent shahridagi Virusologiya ilmiy-tekshirish instituti klinikasida 12 nafar bemorning tuzalgani va mas’ullar ishtirokida reabilitatsiyaga kuzatilganini xabar qildi.

Xabarga ko‘ra, sog‘ayganlarning barchasi Qoraqalpog‘istondan (15 nafari Nukus shahridan, 4 nafari Mo‘ynoq tumanidan, yana 2 nafari Qo‘ng‘irot tumanidan) bo‘lib, kasallikni koronavirusga chalinganlar bilan muloqot qilish oqibatida yuqtirib olgan.

Bemorlarning 9 nafari erkak, 12 nafari ayol, ular orasida eng yoshi kattasi 64 da bo‘lsa, eng kichigi 5 yoshda.

Qoraqalpog‘istonda 27-aprel soat 18:00 holatiga ko‘ra, jami 50 nafar bemor koronavirusdan tuzalgan.

Shuningdek, Toshkentdagi Virusologiya ilmiy-tekshirish instituti klinikasidan 12 nafar koronavirusga chalingan bemor Sog‘liqni saqlash vazirligi mas’ullari ishtirokida Respublika ixtisoslashtirilgan terapiya va tibbiy reabilitatsiya ilmiy-amaliy tibbiyot markaziga kuzatildi.

Bemorlarning 7 nafari Toshkent shahrida, 1 nafari Buxoro viloyatida, 2 nafari Qashqadaryo viloyatida va yana 2 nafari Toshkent viloyatlarida istiqomat qiladi. Ular ham koronavirusga chalinganlar bilan muloqotda bo‘lib, infeksiya yuqtirib olgan. Tuzalganlarning eng yoshi kattasi 65 da bo‘lsa, eng kichigi 9 yoshda.

Klinikada ayni paytga qadar 110 nafar bemor sog‘aygan bo‘lsa, endilikda ular 122 nafarga yetdi.

Avval O‘zbekistonda yana 22 kishi koronavirusdan tuzalgani, Jizzaxda kasallangan bemorlar qolmagani xabar qilingandi.

2020-yil 27-aprel soat 18:15 holati bo‘yicha jami 103 nafar bemor tuzalib, O‘zbekistonda koronavirusdan sog‘ayganlarning umumiy soni 892 nafarga yetdi. Virus aniqlangandan buyon qayd etilgan jami kasallanish holatlari esa 27-aprel soat 10:00 holatiga ko‘ra, 1887 tani tashkil etmoqda. O‘zbekistonda 15-martdan buyon koronavirusga chalingan bemorlarning sakkiz nafari vafot etdi.