Toshkentda xalqaro terrorchilik tashkilotining 25 nafar a’zosi qo‘lga olindi

Toshkent shahri va Toshkent viloyatida yashirincha ravishda faoliyat yuritib kelgan “Tavhid va jihod katibasi” (TJK) xalqaro terrorchilik tashkiloti tarafdorlari 23-iyun kuni aniqlanib, qo‘lga olindi. IIV xabariga ko‘ra, gumon qilinuvchilarni qo‘lga olish bo‘yicha tezkor tadbir IIV, DXX, Toshkent shahar DXXB va IIBB tomonidan amalga oshirilgan.

Jinoyat kodeksi 244-2-moddasi 1-qismiga (diniy ekstremistik, separatistik, fundamentalistik yoki boshqa taqiqlangan tashkilotlarni tuzish, rahbarlik qilish, ularda ishtirok etish) asosan qo‘zg‘atilgan jinoyat ishi doirasida Toshkent shahrining Olmazor, Uchtepa, Chilonzor, Yakkasaroy va Sirg‘ali hamda Toshkent viloyatining Zangiota tumanidagi jami 25 ta manzilda tintuv o‘tkazilib, 25 kishi qo‘lga olingan.

“Dastlabki to‘plangan ma’lumotlarga ko‘ra, mazkur shaxslar hozirda Suriyada xalqaro terrorchilik tashkiloti, TJK safida faoliyat yuritayotgan O‘zbekiston fuqarosi, 2001-yilda Toshkent shahrida tug‘ilgan A.Abduqahhorov va uning rahnamolarining g‘oyaviy ta’siriga tushib, internet orqali ekstremistik mazmundagi videoroliklarni muhokama qilib, ‘hijrat’ va ‘jihod’ amallarini bajarish maqsadida Suriyaga chiqib ketishni rejalashtirgan”, — deyiladi IIV xabarida.

Qayd etishlaricha, qo‘lga olinganlarning uch nafari ilgari terrorizm va ekstremizm bilan bog‘liq jinoyatlar uchun jazolangan. Ushlangan shaxslarning yashash joylarida ashyoviy dalillar topilgan, tergov-surishtiruv tadbirlari davom etmoqda.

Ma’lumot uchun, Oliy sudning 2016-yil 26-sentabrdagi qaroriga asosan “Tavhid va jihod katibasi” xalqaro terroristik tashkiloti faoliyati O‘zbekiston hududida taqiqlangan tashkilotlar ro‘yxatiga kiritilgan.

Mavzuga doir: