Toliblarning Afg‘onistondagi bazaga hujumida 170 dan ortiq kishi halok bo‘ldi

“Tolibon” guruhi jangarilarining Afg‘oniston shimolidagi harbiy bazaga hujumi natijasida kamida 170 kishi halok bo‘ldi. Bu haqda Wall Street Journal afg‘onistonlik mansabdorlarga tayanib xabar bermoqda, deb yozadi “RIA Novosti”.

Avvalroq Afg‘oniston mudofaa vazirligi mamlakat shimolidagi Balx viloyatida joylashgan bazaga 21-aprel kuni uyushtirilgan hujumda 100 dan ortiq harbiy xizmatchi halok bo‘lgani va yaralanganini ma’lum qilgan edi.

Nashr qayd etishicha, hujum guruh faoliyatidagi 2001-yildan buyon eng ko‘p qirg‘in keltirgan hujum bo‘ldi (2001-yilda toliblar Afg‘onistonda hokimiyatdan chetlatilgan edi).