Koronavirus sabab Superliga 10-tur o‘yinlari qoldirildi

Futbol bo‘yicha Coca-Cola Superligasi 10-tur o‘yinlari qoldirildi. Bu haqda Professional futbol ligasi rasmiy saytida xabar berildi.

“Superliganing uch klubi — “Paxtakor”, “Buxoro” hamda “Surxon”da umumiy hisobda o‘ndan ziyod virus yuqtirib olgan futbolchilar bor. Mazkur holat Superliga uchrashuvlarini qayta tiklash oldidan Sanitariya-epidemiologiya osoyishtalik agentligi bilan kelishilgan yo‘riqnoma shartlariga klublar tomonidan rioya qilish sustlashganini anglatadi.

Bugungi kunda vaziyat murakkab ekani sir emas. Bir tomondan futbol uchrashuvlarini to‘xtatish — ortga tashlangan qadam bo‘ladi. Bu holat turli yosh terma jamoalarning xalqaro maydondagi o‘yinlariga ham o‘z ta’sirini ko‘rsatmay qolmaydi. Boshqa tomondan esa futbolchi va murabbiylarning, umuman futbol jamoatchiligining sog‘ligi bilan bog‘liq jihatlarni ham yoddan chiqarmaslik kerak. Ular nafaqat o‘z salomatliklarini, balki oila-a’zolari sog‘ligini ham xavf ostida qoldirishlari mumkin”, — deyiladi PFL bayonotida.

O‘zPFL yuqoridagi fikrlardan, qolaversa, 20-iyul kuni klublar ishtirokida bo‘lib o‘tgan videokonferensiya xulosalaridan kelib chiqib, quyidagi qarorlarni qabul qildi:

Coca-Cola Superligasi uchrashuvlari 28-iyulga qadar to‘xtatiladi va shu kuni chempionat 10-turdan boshlab davom ettiriladi. Taqvimning keyingi ehtimoliy ko‘rinishlari alohida muhokama etiladi. TV dasturlar vaqtiga xalal bermaslik maqsadida 10-tur uchrashuvlarining barchasi 19:00 da start oladi;

Unga qadar Superliganing barcha klublari bor diqqat-e’tiborini futbolchilar salomatligiga qaratadi. Klublarning barchasi xususiy klinikalar bilan hamkorlikda test topshiradi. Bunda O‘zPFL o‘zi ro‘yxatdan o‘tkazgan barcha futbolchi va murabbiylar test topshirganiga ishonch hosil qilishi kerak bo‘ladi. Test javoblarini to‘liq taqdim etmagan klublar qolgan jamoalar futbolchilar salomatligini xavf ostida qoldirmaslik uchun musobaqaga qo‘yilmaydi;

Test topshirgan va uning natijalariga ko‘ra virus aniqlanmagan futbolchilar klub qarorgohiga joylashtiriladi. Ular karantin tartibi yumshatilguniga qadar mashg‘ulotlar va o‘yinlarga o‘z bazalaridan qatnaydi. Boisi, ularning shahar bo‘ylab erkin harakat qilishi, futbolchilar salomatligini, buning ortidan esa chempionat o‘yinlari davomiyligini xavf ostida qoldirishi mumkin.

Ta’kidlanishicha, O‘zPFL avgust oyidagi uchrashuvlarni qanday tashkil qilish va taqvimga qanday o‘zgartirishlar kiritish ustida ish olib boradi. Shuningdek, o‘z ishiga sovuqqonlik bilan yondashgan klublar direktorlari, bosh murabbiylari hamda shifokorlariga nisbatan keskin choralar ko‘riladi. Virus tarqalishini sun’iy ravishda sir tutayotgan klublarga nisbatan SEOM bilan hamkorlikda ish ochiladi.

Eslatib o‘tamiz, avvalroq “Buxoro”ning sakkiz nafar, “Paxtakor”ning besh nafar, “Surxon”ning ikki va “Bunyodkor”ning bir nafar o‘yinchisi koronavirusga chalingani to‘g‘risida xabar berilgandi. Shuningdek, Pro-Ligada qatnashadigan Samarqandning “Dinamo” klubining uch nafar futbolchisida koronavirus infeksiyasi borligi gumon qilinib, 15-iyul kuni “Xorazm”ga qarshi o‘tkazilishi kerak bo‘lgan bellashuv ham bekor qilingandi.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!