Mali prezidenti harbiy isyondan so‘ng iste’foga chiqdi

Mali prezidenti Ibrohim Bubakar Keyt harbiy isyondan so‘ng iste’foga chiqdi. Reuters’ning xabar berishicha, bu haqda u televizion murojaatda ma’lum qildi.

“Hokimiyatni saqlab qolishim uchun qon to‘kilishini xohlamayman”, — degan Keyt. U, shuningdek, parlament va hukumatni ham tarqatib yuborgan.

Eslatib o‘tamiz, Malida mamlakat prezidenti Ibrohim Bubakar Keytning iste’fosini talab qilib 2020-yilning iyun oyidan buyon namoyishlar davom etmoqda. BMT va huquq himoyachilarining ma’lumotlariga ko‘ra, namoyishlar vaqtida kamida 14 kishi halok bo‘lgan.

18-avgust kuni Mali poytaxti Bamako shahri yaqinida harbiylar isyon ko‘tardi. Ular bir qator vazirlar va yuqori lavozimli ofitserlarni qo‘lga olgan. Qo‘lga olinganlar orasida Mali tashqi ishlar vaziri va moliya vaziri ham bor.