17 yoshli Eduardo Kamavinga Fransiya terma jamoasi tarixiga kirdi
“Renn” yarim himoyachisi Eduardo Kamavinga Fransiya terma jamoasining so‘nggi 106-yil ichidagi eng yosh futbolchisiga aylandi, deya xabar bermoqda Opta.
UEFA Millatlar Ligasi musobaqasi doirasida o‘tkazilgan Xorvatiyaga (4:2) qarshi bahsda terma jamoadagi ilk o‘yinini o‘tkazgan Kamavinga 17 yosh-u 10 oylik edi. Shu tariqa u terma jamoaning 106 yil ichidagi eng yosh debyutantiga aylandi.
Kamavinga Fransiya terma jamoasining eng yosh debyutantlari ro‘yxatida uchinchi o‘rinni egallab turibdi. Undan oldinda faqat ikki futbolchi bor. Bular: 1906-yilda, 16 yosh-u 10 oyligida debyut qilgan Jyulyen Verbruje va 1914-yilda ilk o‘yinini o‘tkazgan Moris Gastige (17 yosh-u 4 oylik).
Kamavinga Fransiya chempionatining 2020/21-yilgi mavsumida ikki uchrashuvda maydonga tushib, bittadan gol va golli uzatmaga mualliflik qildi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Manba: Daryo.uz